|
|
ग्रामीण भेगमा ल्यापटप कम्प्युटर
मध्यम वर्गीय परिवारकाले समेत सहज उपयोग गर्न नसक्ने ल्यापटप कम्प्युटर ग्रामीण भेगका स-साना बालबालिकाले उपयोग गर्दै छन्भन्दा पत्यार नलाग्न सक्छ ।
तर ललितपुरको लुभु गाविस-८ मा पर्ने ज्यामिरेकोटमा अवस्थित विश्वामित्र गणेश निम्नमाध्यामिक विद्यालय र लाकुरी भञ्ज्याङ्स्थित बासुकी माध्यामिक विद्यालयमा कक्षा २ र ६ मा पढ्ने विद्यार्थीले सानो आकारको ल्यापटप उपयोग गर्न पाएका छन् ।
शिक्षा विभाग अन्तर्गत रहेको साझा शिक्षा ई पाटीले चालू शैक्षिक सत्रदेखि परीक्षणका रुपमा यी विद्यालयमा निःशुल्क ई पाटी नाम दिइएको ल्यापटप कम्प्युटर वितरण गरेपछि विद्यार्थीहरुले कम्प्युटर मार्फत अध्ययन गर्न थालेका हुन् ।
विश्वामित्र गणेश विद्यालयका कक्षा दुईका २२ जना र कक्षा ६ का ३८ जनालाई ई पाटी वितरण गरिएको छ ।
खेलौनाजस्ता लाग्ने साना ल्यापटप कम्प्युटर पाएपछि स-साना बालबालिका निकै खुसी देखिन्छन् । "भरखरै कम्प्युटर पाइएको छ, सरहरुले सिकाएपछि चलाउन जानिन्छ होला नि "- एक विद्यार्थीले भने ।
लाकुरी भञ्ज्याङस्थित बासुकी माध्यामिक विद्यालयका ६० जना विद्यार्थीलाई पनि ल्यापटप कम्प्युटर वितरण गरिएको छ ।
साझा शिक्षा ई पाटीका कार्यकारी निर्देशक रवि कर्माचार्यले आगामी वर्ष देशका पाँच जिल्लाका १० वटा सामुदायिक विद्यालयमा ल्यापटप वितरण गर्ने कार्यक्रम रहेको जानकारी दिनुभयो ।
डेनमार्कस्थित डेनिस सूचना प्रविधि समाजले परीक्षणका रुपमा २ सय वटा ल्यापटप उपलब्ध गराएको बताइएको छ । ताइवानमा निर्माण गरिएका प्रति ल्यापटपको मूल्य करिब १ सय ८५ अमेरिकी डलर पर्ने बताइएको छ ।
दुई वाट विद्युत खपत गर्ने यी ल्यापटपमा ब्याट्री चार्ज गरेपछि दुई घन्टासम्म सजिलै काम गर्न सकिन्छ ।
विद्यार्थीले आ-आफ्ना घर लान पाउने ल्यापटपमा अहिले कक्षा २ र ६ को अङ्ग्रेजी र गणितको पाठयसामग्री राखिएको र पछि सबै विषयको पाठयक्रम राखिने बताइएको छ ।
पाठय सामग्रीबाहेक ई पुस्तकालय, इन्टरनेट, नेपाली अङ्ग्रेजी बालसहित्यसम्बन्धी सामग्री, अङ्कजाल, शब्दकोशजस्ता सामग्री पनि ल्यापटपमा राखिएका छन् । ल्यापटप नेपाली भाषामा चलाउन सकिनेछ ।
|
|
|
|
 |
|
 |
|
छाप्नुस् |
इमेल
गर्नुस् |
प्रतिक्रिया दिनुस् |
|
|
|
|
|
|
|
प्रविधि
र जीवन |
|
| |
|
